aðkoma ríkisins að kjarasamningum.

Virðulegi forseti. Í áramótaávarpi sínu gerði hæstv. forsætisráðherra að umtalsefni mikilvægi þess að auka kaupmátt og sagði að sérstaklega þyrfti að bæta áþreifanlega kjör þeirra lægst launuðu en þau væru miklu lakari en við gætum talið ásættanlegt á Íslandi. Hæstv. forsætisráðherra hafði stuttu áður leitt ríkisstjórnina í að synja málaleitan verkalýðshreyfingarinnar um að skattkerfisbreytingar kæmu til að mæta hag þeirra sem væru með undir 250 þús. kr. í mánaðarlaun. Aðspurður um það tiltekna efni hefur hæstv. forsætisráðherra síðan sagt hér í ræðustól að skattkerfið henti ekki vel til að bæta kjör hinna lægst launuðu. Þá held ég að það sé bara einn annar kostur og hann er sá að hækka launin.

Nú eru fyrir dyrum kjarasamningar. Í kjarasamningum opinberra starfsmanna og í kjarasamningum sem Alþýðusambandið er í forsvari fyrir, þar sem laun eru hvað lægst, þá eru þeir yfirleitt gagnvart ríki eða sveitarfélögum. Ég verð því að spyrja hæstv. forsætisráðherra, fyrst hann vill ekki nota skattkerfið til að bæta hag þeirra lægst launuðu, ef hann meinar eitthvað með þeim orðum sem hann notaði í áramótaávarpinu, hvort þá sé að vænta tillagna frá ríkisstjórninni í kjarasamningum sem miða sérstaklega að því að hækka lægstu laun. Nú er tækifærið vegna þess að þeir hópar sem eru með hvað lægstu launin eru hlutfallslega fjölmennastir í starfsmannaliði hins opinbera.