hönnunarstefna stjórnvalda.

Virðulegi forseti. Ég held að við séum öll sammála um það að ánægjulegt hefur verið að fylgjast með þeirri grósku sem hefur verið í íslenskri hönnun og nýsköpun enda vitum við öll að vaxtarmöguleikarnir eru þar miklir. Á dögunum kynnti hæstv. ráðherra, Ragnheiður E. Árnadóttir, hönnunarstefnu stjórnvalda fyrir næstu fjögur ár. Það er eitt af góðum verkum sem ég held að hafi ekki mistekist á síðasta ári því að sú vinna hófst á síðasta kjörtímabili og var að ljúka núna.

Í þeirri stefnu eru meðal annars fyrirheit um að vegur hönnunar verði aukinn með því að auka hlutdeild hönnunar í grunn- og framhaldsskólum. Það á að styrkja og efla rannsóknartengt nám í hönnun, háskólanám. Þessi verkefni eru á ábyrgð mennta- og menningarmálaráðuneytisins og undirstofnana þess. Um leið og við fögnum þessari nýju hönnunarstefnu verður að segja, því miður, að við stóðum frammi fyrir því við gerð fjárlaga að núverandi ríkisstjórn lækkaði mjög framlög til hönnunar og listgreina um tugi milljóna. Og ekki nóg með það, hún setti hönnunarsjóð á núll en það var fyrir tilstilli okkar í minni hlutanum sem settir voru náðarsamlegast í hann svolitlir fjármunir.

Því langar mig til að spyrja hæstv. ráðherra: Hvernig áformar ráðuneytið að standa að þeim verkefnum sem það hefur skuldbundið sig til að sinna samkvæmt hinni nýju hönnunarstefnu 2014–2018? Hversu miklu fé er áætlað að verja til þeirra verkefna á því tímabili sem þessi nýja hönnunarstefna nær yfir?