umsókn Íslands um aðild að Evrópusambandinu dregin til baka.

Herra forseti. Ég þakka hv. þingmanni fyrir ræðu hans um málið. Það er tvennt sem ég vildi bregðast við og velta upp við hv. þingmann.

Í fyrsta lagi notaði hann nokkurn tíma af ræðu sinni til að ræða um hugsanlegar sérlausnir eða undanþágur, einkum og sér í lagi hvað varðar sjávarútvegsmál, en auðvitað geta þær átt við um fleiri málaflokka að sjálfsögðu, en segir að ekki séu miklar líkur á því að það geti náðst og sé ólíklegt. Spurning mín er þessi: Er nokkur leið til að komast að því með óyggjandi hætti nema að ljúka aðildarviðræðunum og sjá hvað er á blaðinu? Við getum öll verið með vangaveltur um hvað sé líklegt og hvað sé ólíklegt á grundvelli þess sem hefur tíðkast áður eða ekki tíðkast. Er nokkur leið til þess að fá úr því skorið á óyggjandi hátt hvaða sérlausnir mundu fást og hvernig þær yrðu, varanlegar undanþágur eða tímabundnar, nema að fá endanlegan samning á borðið?

Hin spurningin sem ég velti upp við hv. þingmann er um hvort hann telji ekki mikilvægt, meðal annars í ljósi þeirra mjög svo afdráttarlausu kosningaloforða sem Framsóknarflokkurinn gaf í kosningabaráttunni fyrir síðustu kosningar, að þjóðin eigi aðkomu að þeirri ákvörðun sem tekin verður í málinu.

Þetta eru þær tvær spurningar sem ég vildi beina til hv. þingmanns.