umsókn Íslands um aðild að Evrópusambandinu dregin til baka.
Frú forseti. Það eru reyndar fjölmörg rök fyrir því af hverju við ættum að afturkalla aðildarumsóknina að þessu sinni. Fyrst og fremst er það þannig að á þinginu er ekki meirihlutavilji fyrir því að ganga í Evrópusambandið. Ég hef ekki séð eina einustu könnun frá því að fyrstu kannanir voru gerðar um þessi mál sem sýna fram á að meiri hluti landsmanna vilji ganga í Evrópusambandið. Ég tel að ástandið í viðræðum við Evrópusambandið eigi að endurspegla fyrst og fremst þetta tvennt, þ.e. vilja ríkisstjórnar, stjórnvalda á Íslandi á hverjum tíma, meiri hluta þings og síðan meirihlutavilja þjóðarinnar eins og hann birtist okkur meðal annars í kosningum og eftir atvikum í skoðanakönnunum.
En þá kemur sú staðreynd inn í myndina að mjög margir eru hlynntir viðræðum, jafnvel þótt þeir séu á sama tíma andvígir inngöngu í Evrópusambandið. Mín skoðun er sú að við stöndum á mjög merkilegum tímamótum í framkvæmd lýðræðis á Íslandi eftir atburði síðustu tíu ára. Ég hef mjög ríkan og djúpan skilning á því (Forseti hringir.) að fólk vilji koma að stórum ákvörðunum og úrlausnarefni okkar í utanríkismálanefnd og á þinginu verður að vinna með það hvernig við getum mætt þeirri kröfu.
