störf þingsins.
Hæstv. forseti. Nokkrir hv. þingmenn hafa rætt hér andrúmsloftið sem umlykur stjórnmálin og okkar störf. Ég greip orðið á götunni sem berst til okkar gegnum eyjan.is. Þar segir meðal annars, með leyfi forseta:
„Þjóðin er orðin dauðleið á endalausum deilum um keisarans skegg. Dag er tekið að lengja. Vorilmur er í lofti. Bjartsýni fer vaxandi. Grillkjötið er komið í hillur matvöruverslana. Ágætt væri að hinir kjörnu fulltrúar okkar á löggjafarsamkundunni tækju í auknum mæli mið af því.“
Ég upplifi sannarlega vorilminn og bjartsýnina. Það er notaleg tilhugsun að sjá fyrir sér grillstundina renna upp. Þau skilaboð til okkar í okkar störfum að láta af endalausum deilum um keisarans skegg, eins og það hljómar af götunni, minnir okkur þó á hve ábyrgðarmikið erindi okkar við þjóðina er. Sannarlega eru mörg mikilvæg mál undir.
Hæstv. forseti. Við hv. þingmenn megum ekki verða ónæmir fyrir slíkri gagnrýni eða sýn kjósenda á okkar störf. Ég upplifi reyndar málefnalega og auðvitað stundum beitta rökræðu í okkar störfum þegar við missum okkur ekki í að ræða um fundarstjórn hæstv. forseta í of miklum mæli. Það er vissulega ávallt í okkar höndum að greiða fyrir skilvirku þinghaldi, klára mikilvægu málin og leiðrétta verðtryggð fasteignaveðlán heimilanna.
Ég trúi því að græna vorið sé runnið upp.