séreignarsparnaður og ráðstöfun hans til greiðslu húsnæðislána og húsnæðissparnaðar.
Hæstv. forseti. Ég vil þakka hv. þm. Steingrími J. Sigfússyni fyrir yfirgripsmikla ræðu. Það eru nokkur atriði sem mig langar að tæpa á við hann. Í fyrsta lagi er það lánsveðshópurinn sem rætt var um og hvernig þessar aðgerðir sem við ræðum núna, og raunar líka þær tillögur sem ræddar verða hér á morgun, koma við þann hóp. Jafnvel þótt menn segi að þetta muni létta á greiðslubyrði og létta þar af leiðandi á þeim sem hafa lánað lánsveð lækkar lánsveðið ekki að mér skilst. Það væri gaman að heyra aðeins um það af því að ég veit að hv. þingmaður vann mjög ítarlega í þessu máli á sínum tíma.
Mig langar líka að heyra betur um þessi 125 þúsund heimili í landinu. Menn reikna með að 100 þúsund heimili geti notað þetta. Mig langar að biðja hv. þingmann að fara betur yfir þær tölur sem hann var með. Ef það eru 25% sem eiga húsnæði sitt, hvað eru margir leigjendur af þessum 125 þúsund heimilum? Hvernig í veröldinni geta menn komið að þessum 125 þúsund heimilum nema með því að reikna með að allir borgi eða a.m.k. 90–100% noti séreignarsparnaðinn (Forseti hringir.) og bæti sér þá þar við? Þá kemur líka spurningin um tekjur og hvort menn hafi efni á því.