virðisaukaskattur o.fl.
Virðulegur forseti. Þetta eru engin geimvísindi og það þarf engar sérstakar stofnanir til að reikna það út. Þetta eru um það bil 10 milljarðar, heimilin í landinu eru um 100 þúsund og allir þeir sem þekkja til í reikningi vita að 10 milljarðar deilt með 100 þúsund er 100 þúsund. Það er hækkunin á hvert heimili í landinu. Svo geta menn fengið alls konar stofnanir til að reyna að reikna það niður í 40 þús. eða 20 þús. af því að það komi eitthvað annað á móti.
Hæstv. fjármálaráðherra verður að búa við það að þetta er aðgerðin. Hann hefði getað ákveðið að fella niður vörugjöld, og ég hefði út af fyrir sig stutt það, og fjármagnað það með því að framlengja auðlegðarskattinn til að mynda að hluta eða halda veiðigjöldunum. Við gætum sameinast um það. Þá gætum við líka losnað við vörugjöldin og við gætum líka lækkað efra þrepið í virðisaukaskatti og haldið veiðigjöldunum aðeins hærri eða framlengt auðlegðarskattinn áfram eins og við höfum framlengt höftin, enda voru þau ætluð til að standa til jafn langs tíma. Við þurfum ekki að hækka neðra þrepið úr 7% í 12% til að fjármagna afnám vörugjalda. Þess vegna er það sjálfstæð ákvörðun að hækka matarverð um 5% með þessari skattheimtu.
Fjármálaráðherra getur reynt að telja sjálfum sér trú um að það verði bara 2,5%. Það er samt tilfinnanlegt. Og hitinn og rafmagnið og bækurnar munu engu að síður hækka að fullu um það sem þessu nemur, með þeim þunga sem það hefur í för með sér fyrir heimilin. Síðan vita Íslendingar auðvitað að hækkunin mun örugglega skila sér. En munu lækkanirnar skila sér? Nei, virðulegur fjármálaráðherra. Reynslan sýnir okkur að það gera þær ekki nema að takmörkuðu leyti. Við höfum ágæta skýrslu frá apríl 2008 um það hvernig lækkunin úr 14% í 7% skilaði sér og það var sannarlega ekki að fullu.