áætlun um vernd og orkunýtingu landsvæða.
Virðulegi forseti. Ég þakka hv. þingmanni andsvarið. Varðandi það að þessar virkjanir séu við byggð þá var tekist á um það í samfélaginu fyrir nokkrum árum. Margir komust að þeirri niðurstöðu að það væri skynsamlegt að færa virkjanir, sem eru skilgreindar sem rennslisvirkjanir en eru vissulega með nokkur miðlunarlón við virkjanirnar, í manngert umhverfi byggðar. Ég er og hef verið sannfærður um það lengi að vinna þeirra sem hafa barist gegn virkjunum hafi skilað sér í að hönnun þessara mannvirkja er miklu betri en fyrstu hugmyndir gáfu til kynna, og þar af leiðandi hafi verið tekið tillit til margra þátta sem menn hafa bent á. Gengið hefur verið til samninga við umtalsverðan fjölda þeirra o.s.frv.
Það er kannski ekki það sem við erum að ræða um hér og ekki heldur hvert orkan fer eða, eins og hv. þingmaður spurði um, hvort einhver kostnaðargreining muni fara fram með tilliti til orkuverðs og einhverra annarra þátta, það er ekki verkefni rammaáætlunar. Í rammaáætlun eru kostir flokkaðir í þrjá flokka. Það varð talsverð umræða hér við lok umræðunnar um þá rammaáætlun sem var síðast kláruð hvort við skildum eftir biðflokk þar sem við ætluðum ekki að heimila frekari rannsóknir en það eru þær sem svara spurningunum um hvort við ætlum að flytja viðkomandi kosti í nýtingarflokk eða í verndarflokk. Rammaáætlunin er í raun og veru bara tæki til þess að flokka í þessa þrjá flokka. Fari kostir í nýtingarflokk tekur við umtalsverð vinna löngu áður en menn hefja í raun og veru framkvæmdir við virkjanir, mislöng eftir því hvað menn hafa átt þess kost að rannsaka (Forseti hringir.) og hanna viðkomandi virkjunarkosti í langan tíma, sem getur auðveldað að fá nýjustu (Forseti hringir.) upplýsingar um hagkvæmni kostsins.