menntun íslenskra mjólkurfræðinga.

Hæstv. forseti. Ég þykist þekkja aðdraganda þessarar fyrirspurnar og þakka hv. þingmanni kærlega fyrir að leggja hana fram. Mér finnst nauðsynlegt að taka fram að mjólkurfræðingar starfa ekki aðeins í mjólkursamlögum, þeir starfa líka m.a. í sælgætisgerðum, ölgerðum og öðru og einnig við rannsóknir og vöruþróun.

Það sem hæstv. menntamálaráðherra kom inn á er að samstarf Íslands og Danmerkur varðandi mjólkurfræðinámið byggir á samstarfi fræðslunefndarinnar og skólans úti. Ég held að það þurfi að skoða svolítið í því samhengi samkomulag Norðurlandanna um nám milli landamæra og þau loforð sem við höfum gefið hvert öðru þar.

Mig langar einnig að segja að á sama tíma og þessi fyrirspurn kom fram lagði ég fram tillögu til þingsályktunar um eflingu náms í mjólkurfræði þar sem leitað verður leiða og athugað hvort hægt sé að hjálpa Íslendingum að komast í slíkt nám og þá hvort íslenskur mjólkuriðnaður geti komið þar að eða hvort ríkið getið með öðrum hætti náð að leysa úr þeim vanda sem þessi háu námsgjöld eru.