verslun með áfengi og tóbak o.fl.

Hæstv. forseti. Ég þakka fyrir að fá orðið hér í upphafi þessarar atkvæðagreiðslu. Við umræðu um málið voru í reynd ræddar þrjár tillögur, sú sem flutningsmaður leggur til, að málið gangi til allsherjar- og menntamálanefndar þingsins, og í öðru lagi að málið gangi til efnahags- og viðskiptanefndar þingsins sem væri eðlilegt í þeim skilningi að málið hefur heyrt undir þá nefnd fram til þessa. Þriðji kosturinn er að vísa málinu til velferðarnefndar sem er eðlilegast í ljósi þess að um lýðheilsumál er að ræða, heilbrigðismál, og það heyrir undir velferðarnefnd.

Ég hef hins vegar ákveðið að draga þessa tillögu til baka í þeirri von og vissu að allsherjarnefnd muni skjóta málinu til umsagnar velferðarnefndar þannig að málið fái þá umræðu þar sem því ber.