fjáraukalög 2014.

Frú forseti. Það verður að segjast eins og er að þetta mál virðist vera dálítið flóknara fyrir marga en efni standa kannski til. Þá er ég ekki að vísa í orð hv. þingmanns hér, ég er bara að vísa í hina almennu umræðu. Þegar samningar um sérfræðilæknana féllu úr gildi var gjaldskráin gagnvart sjúklingunum í raun og veru óvirk. Sérfræðilæknar innheimtu gjald af sjúklingum eftir eigin höfði í nokkur ár.

Þegar samningar takast að nýju við sérfræðilækna tekur aftur gildi ástand þar sem sett er þak á þátttöku sjúklinga með reglugerð úr heilbrigðisráðuneytinu eða velferðarráðuneytinu. Þátttakan hækkaði miðað við það sem áður hafði verið, en í því sambandi verður að hafa í huga að engin gjaldskrá hafði í raun gilt í nokkur ár. Þess vegna er hækkunin í almennri umræðu oft talin til merkis um að hér séu gjöld á sjúklinga að hækka.

En jafnvel þótt gjaldskráin hafi hækkað frá því sem áður var er gjaldið sem er tekið af sjúklingum lægra en það sem læknarnir höfðu tekið í samningsleysinu. Þetta þýðir með öðrum orðum að verði gjaldskráin hækkuð til fulls, þ.e. til jafns við það sem sjúklingar höfðu verið að greiða sérfræðilæknum í samningsleysinu, er raunhækkun á sjúklinga engin. Þetta er það sem heilbrigðisráðherra gerir ráð fyrir að gerist á næsta ári, að gjaldskráin hækki og við það verði raunkostnaður sjúklinga hinn sami og var í samningsleysinu. En á þessu ári tekur ríkissjóður mismuninn, (Forseti hringir.) sem þýðir raunlækkun fyrir sjúklinga.