breyting á lögum um Stjórnarráðið.

Virðulegi forseti. Þessi mikilvægu atriði, réttindi starfsmanna til dæmis og æskilegur tímarammi um slíka flutninga, kröfur til þess að flutningarnir fari ekki fram úr kostnaði, að flutningarnir hafi faglegar forsendur — það nægir mér ekki að hæstv. forsætisráðherra segi bara: Já, það er æskilegt að hafa þetta í huga. Það nægir mér ekki.

Mér finnst að ef við ætlum að fara að breyta lögum um þetta — og lögum var breytt 2011, það er rétt, það var tekin út þessi heimild ráðherra til að flytja stofnanir til — ef ráðherra á að fá slíka heimild verði það að vera með einhverri lagaumgjörð. Og sporin hræða í þessu.

Gefin var út munnleg yfirlýsing án fyrirvara, sem kom öllum á óvart, um að flytja ætti Fiskistofu til Akureyrar. Fiskistofa má vera á Akureyri, en það verður að framkvæma yfir miklu lengri tíma og með miklu faglegri hætti. Nú er starfsemi stofnunarinnar í algjöru uppnámi og það á að fara að greiða starfsmönnum fyrir að koma til Akureyrar, (Forseti hringir.) og ef þeir vilja ekki flytja þangað verður litið svo á að þeir hafi sagt upp störfum.

Lítur forsætisráðherra svo á að (Forseti hringir.) áformin um Fiskistofuflutningana séu til eftirbreytni?