virðisaukaskattur o.fl.

Virðulegur forseti. Ég þakka hv. þingmanni fyrir spurningarnar tvær um sykurskattinn og síðan hvernig þetta skilar sér út í verðlagið með lækkanirnar.

Ég verð að segja að ég hef mikla samúð með því sjónarmiði að hugsanlega hefði verið snjallt að setja til dæmis sykur, gos og sælgæti, í efra þrep virðisaukaskattsins. Ég er ekki frá því að það gæti enn verið góð hugmynd. Í þetta sinn var lendingin þessi, þessi málamiðlun sem farin er. En ég hef mikla samúð með þessu sjónarmiði.

Ég trúi því ekki að þó að gosið yrði eitthvað dýrara við það eða sælgætið þá mundi fólk neita sér um það, ég held ekki. Þeir sem huga ekki að heilsunni í neyslu sinni, hvort sem það er á áfengi eða sykri eða einhverju öðru sem við vitum að er óhollt, mega gjarnan borga meira til samfélagsins og til heilbrigðiskerfisins. Mér finnst það bara sanngjarnt. Ég held að það sé ákveðin skynsemi í því.

Menn geta svo velt fyrir sér hvort hafa ætti miklu hærri álögur til að draga úr neyslu eins og gert er með áfengi og annað. Ég hef kannski minni samúð með því sjónarmiði, ég held að það geti haft aðrar óæskilegar aukaverkanir. En alla vega væri þetta að mínu mati eitthvað sem mætti skoða í framtíðinni.

Varðandi það hvernig lækkanir skila sér út í verðlagið. Þar er efinn og það hefur komið fram í ýmsum rannsóknum að þegar gengið hækkar skila hækkanir sér út í verðlagið, lækkanir skila sér ekki nægilega vel út í verðlagið, þ.e. neytendum til hagsbóta. Þetta er eitthvað sem þarf að huga að.

Ég held hins vegar að það hafi líka komið fram fyrir nefndinni að þegar mikil athygli er á einhverjum hlut og allir neytendur eru með opin augun og fylgja málum vel eftir þá skila breytingar sér miklu hraðar og betur út í verðlag.