virðisaukaskattur o.fl.

Virðulegi forseti. Ég get tekið undir þær áhyggjur sem hv. þingmaður viðrar hér af stöðu dagblaða. Það er dálítið merkilegt að ýmsir hv. þingmenn stjórnarflokkanna sem hafa mjög miklar áhyggjur af því að Ríkisútvarpið sé eiginlega helsti þröskuldur frjálsrar fjölmiðlunar í landinu, það taki of mikið pláss á markaði. Þeir ætla núna að hækka virðisaukaskatt á dagblöð. Það er eins og með þetta og annað, það vantar ákveðið samhengi, það vantar að orð og gjörðir fari saman.

Hvað varðar virðisaukaskattsþrepin þá nefndi ég þetta hér áðan og get farið yfir það. Mjög margar þjóðir hafa farið þá leið sem hv. þm. Össur Skarphéðinsson nefndi áðan, að hafa núll skatt. Bretland hefur gert það. Írland hefur farið þá leið. Bretar hafa rökstutt þetta sérstaklega með því að bókum sé að fækka sem eru gefnar út fyrir börn. Það gerir sjálft Bretland sem hefur eina sterkustu barnabókahefð í Evrópu fyrir utan Norðurlöndin. Í Noregi er núll skattur og í Úkraínu. 17 þjóðir Evrópu eru með minna en 7% virðisaukaskatt á bókum. Níu þjóðir eru með 8–10% virðisaukaskatt á bókum. Þótt við séum ekki að tala um 14%, sem eykur enn skaðann, heldur förum bara upp í 11% þá eru einungis fjórar þjóðir Evrópu með 12–25% virðisaukaskatt á bókum, þ.e. Búlgaría sem ég nefndi hér áðan þar sem læsi er verst í Evrópu, Tékkland, Danmörk og Lettland. Ég nefndi Lettland, en hækkunin sem ráðist var í á virðisaukaskatti þar hafði beinlínis þau áhrif að nýútgefnum bókum fækkaði.

Við munum því skera okkur úr. Þær mótvægisaðgerðir sem hafa verið boðaðar við þetta eru faktískt engar. Engar mótvægisaðgerðir hafa verið boðaðar fyrir prentmiðlana í landinu. Það eru engar mótvægisaðgerðir við bókaútgáfu í landinu, hvað þá tónlistina. Ég(Forseti hringir.) tel ekki með einhverjar örfáar milljónir sem boðað er að renni í tónlistarsjóð og Bókasafnssjóð höfunda. Það sér hver maður að það er ekki nein alvörumótvægisaðgerð.