fjárlög 2015.
Virðulegi forseti. Ég ætla ekki að gera uppsteyt út af mínútunni, en mig langar að spyrja út í nokkra afmarkaða þætti í fjárlagafrumvarpinu sem við höfum töluvert rætt í nefndinni og ákall er um að bæta. Það varðar skólamálin.
Fyrst eru það dreifnámsskólarnir, hvort við séum með þá trygga í frumvarpinu. Meðal annars eru miklar áhyggjur vegna deildarinnar á Patreksfirði sem telur sig þurfa meira fé. Mig langar að vita hvort formaður fjárlaganefndar telji það vera tryggt.
Síðan er það rannsóknarstyrkurinn hjá Háskólanum á Akureyri. Það hefur komið ítrekað fram að þeir vilja fá hann inn sem rannsóknarmissiri fyrir kennara en ekki heimskautalögfræði. Einnig segir rektor að hann telji að sér sé refsað fyrir aðhald í skólanum. Ég vil spyrja hv. formann fjárlaganefndar hvort hún taki undir það og hvort hún sé tilbúin til að breyta skilyrðinu sem fylgir 30 milljónunum og setja þær eingöngu í rannsóknarmissiri.