fjárlög 2015.
Herra forseti. Ég þakka hv. þingmanni fyrir ræðuna sem fjallaði að nokkru leyti um mál nr. 2, um virðisaukaskatt og neyslustýringu og annað slíkt. Ég ætla ekki að koma inn á það.
Embætti sérstaks saksóknara var sett á laggirnar af þáverandi hæstv. dómsmálaráðherra, Birni Bjarnasyni, sem er sjálfstæðismaður. Sérstakur saksóknari átti að starfa í tvö ár og taka á þeim brotum sem urðu til eftir hrunið. Hann er nú búinn að starfa í sex ár, hann er sem sagt búinn að vera fjórum árum lengur en til stóð þannig að það er mjög eðlilegt að menn taki á því, vinni að breytingum á embættinu og sameini það venjulegu kerfi.
Varðandi heilbrigðiskerfið og læknaverkfallið, sér hv. þingmaður fyrir sér að læknar fái einir hækkanir eða eiga sjúkraliðar og hjúkrunarfræðingar líka að fá hækkanir? Á allur Landspítalinn að fá hækkanir? Hverja ætlar hann að undanskilja,? Og hvað með aðra opinbera starfsmenn? Þeir krefjast 40% hækkunar. Verður þá ekki bara skriða um allt kerfið?