tekjuskattur o.fl.
Virðulegi forseti. Ég mæli fyrir nefndaráliti frá efnahags- og viðskiptanefnd með breytingartillögu um frumvarp til laga um breytingu á lögum um tekjuskatt, lögum um staðgreiðslu opinberra gjalda, lögum um staðgreiðslu skatts á fjármagnstekjur, lögum um fjársýsluskatt, tollalögum, lögum um vörugjald af ökutækjum, eldsneyti o.fl. og lögum um búnaðargjald, með síðari breytingum.
Nefndarálit ásamt breytingartillögu er að finna á þskj. 719.
Nefndin hefur fjallað um málið og fengið á sinn fund gesti frá fjármála- og efnahagsráðuneytinu og endurskoðunarfyrirtækjum. Þá bárust nefndinni sex umsagnir um málið. Nefndin þakkar gestum og umsagnaraðilum þeirra framlag.
Í frumvarpinu eru lagðar til breytingar á sjö lögum í þeim tilgangi að samræma, einfalda og skýra löggjöf á sviði skatta- og tollamála til að styrkja framkvæmd þeirra. Breytingarnar hafa ekki áhrif á kostnað og tekjur ríkissjóðs.
Í nefndarálitinu er fjallað um fjögur atriði frumvarpsins sérstaklega. Í fyrsta lagi milliverðlagningarreglur Efnahags- og framfarastofnunarinnar, OECD. Fyrir nefndinni voru gerðar athugasemdir við brottfellingu milliverðlagningarreglna Efnahags- og framfarastofnunarinnar, annars vegar við mat og leiðréttingu á verðlagningu á milli tengdra aðila og hins vegar þegar kemur að varðveislu skjölunarskylds aðila á gögnum.
Nefndin bendir á að í athugasemdum við frumvarpið kemur fram að milliverðlagningarreglur OECD verði eftir sem áður mikilvæg heimild við beitingu milliverðlagningarreglna á Íslandi rétt eins og í öðrum ríkjum OECD enda séu íslensku reglurnar byggðar á þeim grundvallarreglum sem þar koma fram. Þá er sérstaklega tekið fram að í tillögunum felist engar efnislegar breytingar á íslenskum reglum um milliverðlagningu. Sú skýring var gefin fyrir nefndinni að tillaga um brottfellingu vísana til milliverðlagningarreglna OECD grundvallaðist á því að óheppilegt væri að vísa í íslenskum lögum til reglna sem væru á erlendu tungumáli, ekki birtar hér á landi og kaupa þyrfti sérstakan aðgang að í gegnum OECD.
Að mati nefndarinnar og í ljósi framangreinds á það ekki að valda sérstökum vafa að milliverðlagningarreglurnar munu eftir sem áður verða notaðar við skýringu ákvæða um mat á leiðréttingu á verðlagningu milli tengdra lögaðila og varðveisluskyldu skjölunarskylds aðila. Með breytingunni er þannig ekki verið að opna fyrir setningu sérstakra íslenskra reglna um milliverðlagningu.
Í öðru lagi er fjallað um gildistöku ákvæða laga nr. 142/2013, um skjölunarskyldu. Á fundi nefndarinnar kom fram að gildistökuákvæðið þætti óljóst þar sem hægt væri að skilja það á þann hátt að ef rekstrartekjur lögaðila hefðu farið yfir 1 milljarð kr. á árinu 2013 væri þeim skylt að hefja skjölun á árinu 2014.
Nefndin bendir á að í athugasemdum við frumvarp það sem varð að lögum nr. 142/2013 segir um gildistökuna að ákvæðið öðlist þegar gildi og komi til framkvæmda 1. janúar 2014 þannig að áhrifa þess gæti fyrst við álagningu 2015 vegna rekstrarársins 2014. Að mati nefndarinnar er því ljóst að skjölunarskyldan stofnast ekki fyrr en árið 2015 ef 1 milljarðs kr. markinu er náð á árinu 2014.
Í þriðja lagi er fjallað um skilyrði vegna bifreiða fatlaðs fólks sem undanþegnar eru vörugjaldi. Í 18. gr. frumvarpsins er lagt til að allur vafi verði tekinn af um að það sé skilyrði niðurfellingar vörugjalda af bifreiðum sem eru sérstaklega búnar fyrir fatlað fólk, að þær séu búnar hjólastólalyftu eða öðrum sambærilegum búnaði.
Í umsögn sem nefndinni barst var lýst áhyggjum vegna þess að ekki kæmi fram með nægilega skýrum hætti hvort lyfta, rampur, lyftusæti og lyftuarmur fyrir einstaklinga sem aka sjálfir teljist til búnaðar sem er sambærilegur hjólastólalyftu. Skilningur nefndarinnar er að þessi búnaður sé dæmi um búnað sem telst falla undir hugtakið sambærilegur búnaður.
Í fjórða lagi er í nefndarálitinu fjallað um skattskylda aðila samkvæmt lögum um fjársýsluskatt. Athygli nefndarinnar var vakin á því að annmarkar væru á skilgreiningu laga um fjársýsluskatt á skattskyldum aðilum þar sem orðalag skilgreiningarinnar væri ekki í fullu samræmi við markmið löggjafans. Við setningu laganna var gert ráð fyrir því að fjársýsluskattsskylda tæki til fjármálafyrirtækja eða aðila sem stunduðu starfsemi sem væri undanþegin virðisaukaskatti. Að mati nefndarinnar er því eðlilegt að lagfæra skilgreiningu skattskyldra aðila um fjársýsluskatt, víkka skattskylduna út þannig að hún taki einnig til annarra aðila sem í atvinnuskyni eða með sjálfstæðri starfsemi sinni inna af hendi vinnu eða þjónustu sem er undanþegin virðisaukaskatti, samkvæmt 10. tölulið 3. mgr. 2. gr. laga um virðisaukaskatt. Að öðrum kosti gætu aðilar sem eru undanþegnir virðisaukaskatti samkvæmt framansögðu einnig talist undanþegnir fjársýsluskatti og þar með verið vanskattaðir af þessum hluta starfsemi sinnar auk þess sem slík staða kann að valda mögulegri röskun á samkeppnisstöðu.
Nefndin leggur því til að frumvarpið verði samþykkt með svohljóðandi breytingu:
13. gr. orðist svo:
Á eftir orðunum „önnur fjármálafyrirtæki samkvæmt lögum nr. 161/2002, um fjármálafyrirtæki“ í 2. tölulið 2. gr. laganna kemur: rafeyrisfyrirtæki samkvæmt lögum nr. 17/2013, um útgáfu og meðferð rafeyris, og aðrir þeir aðilar.
Undir nefndarálitið rita Frosti Sigurjónsson formaður, Líneik Anna Sævarsdóttir framsögumaður, Pétur H. Blöndal, Jóhanna María Sigmundsdóttir, Guðmundur Steingrímsson, Unnur Brá Konráðsdóttir og Vilhjálmur Bjarnason.
Undir álitið rita með fyrirvara hv. þm. Árni Páll Árnason og Steingrímur J. Sigfússon.
Virðulegi forseti. Nú er það svo að frumvarpið var lagt fram á haustþingi og gildistökuákvæði þess miðuð við að frumvarpið væri samþykkt á árinu 2014. Framsögumaður leggur því til að frumvarpinu verði vísað til efnahags- og viðskiptanefndar á milli 2. og 3. umr. og gildistökuákvæði þess yfirfarin. Auk þess hafa framsögumanni borist frekari ábendingar um ákvæði laga nr. 142/2013, um skjölunarskyldu innlendra aðila sem eingöngu eiga í viðskiptum við aðra innlenda aðila sem þeir eru tengdir og/eða eru í samsköttun með. Nefndin hefur nú þegar fjallað nokkuð um þetta atriði laganna en framsögumaður metur það sem svo að tilefni sé til frekari skoðunar hjá nefndinni.
