störf þingsins.
Forseti. Ummæli hæstv. umhverfisráðherra um að milda beri þýðingar tilskipana Evrópusambandsins hafa vakið helsta andstæðing Framsóknarflokksins af værum blundi. Hver er sá andstæðingur? Jú, það er umræðan, en hún er komin í gang að nýju og hefur ekki verið hliðholl Framsóknarflokknum undanfarin missiri. Það er auðvitað ekki vegna þess að hugmyndir þeirra, orð og athafnir eigi ekki upp á pallborðið hjá níu af hverjum tíu Íslendingum, heldur vegna þess bara hversu makalaus umræðan er.
Ég skil vel að framsóknarmenn séu orðnir pirraðir út í EES. Þeir eru á móti inngöngu í Evrópusambandið og byggja þá skoðun sína á væntumþykju um fullveldi Íslands. Ég hef að undanförnu farið upp í atkvæðaskýringar þegar greidd eru atkvæði um EES-mál hér í þinginu til þess að horfa framan í þessa útverði hins íslenska fullveldis á meðan þeir greiða atkvæði með löggjöf sem samin er í Brussel af Evrópusambandinu án aðkomu íslenskra þingmanna þar. Það er skemmst frá því að segja að þeir eru í framan eins og fólk sem gengur í gegnum haglél, að minnsta kosti á meðan á minni atkvæðaskýringu stendur. Svo halda þeir áfram í einlægri trú og fullkominni afneitun um að þeir séu að verja hér fullveldið.
Ég skora því á þá að taka af skarið og fylgja sannfæringu sinni og flytja hér mál á grunni hennar um breytingar á tilskipunum um Evrópusambandið, um sjávarútvegsmál, eða hefur umræðan borið þá ofurliði?
Ég segi fyrir sjálfan mig og fyrir minn flokk: Virkjum fullveldið innan Evrópu. Tökum þátt í að móta sameiginlega löggjöf okkar heimshluta. Göngum í Evrópusambandið.