Norræna ráðherranefndin 2014.
Virðulegi forseti. Ég þakka hv. þm. Guðbjarti Hannessyni kærlega fyrir ræðu hans eða andsvar. Þegar þingmaðurinn kemur hér og talar um hugsunina með norræna módelinu og að ákveðið hlutfall af samneyslunni sé stimpillinn á það að við séum að tala um norræna velferð verð ég einfaldlega að mótmæla því. Ég veit alveg að hv. þingmaður átti kannski ekki beint við það og að hann veit betur en svo, því að þegar hv. þingmaður var velferðarráðherra og sjálfur með heilbrigðismálin bárust tölur af alþjóðlegum vettvangi þar sem verið var að mæla gæði t.d. heilbrigðisþjónustunnar á Íslandi. Það sýndi sig að þrátt fyrir að við værum með eitt ódýrasta heilbrigðiskerfi innan OECD-ríkjanna vorum við í efstu sætum þegar horft var á árangurinn, til að mynda þegar kom að lifun eftir brjóstakrabbamein eða prósentur hvað varðar barnadauða. Í mínum huga er ekki endilega alltaf lausnin eða lykillinn að norrænni velferð að við setjum sem mesta peninga í hlutina heldur að við náum þeim árangri sem við stefnum að.
Það sem mér finnst svo gott við að hitta aðra ráðherra í ráðherranefndum frá hinum Norðurlöndunum og þingmenn á fundi hjá Norðurlandaráði er að finna að þótt við getum deilt um ákveðnar leiðir eru gildin, hin norrænu gildi og afstaða til þess hvað það er sem raunverulega skiptir máli mjög líkt. Það er það sem við byggjum á og það er það sem maður finnur þegar við vinnum saman. Ég nefndi áðan jafnréttisráðherrana og við getum til dæmis hist á hálftímafundi þar sem við förum stuttlega yfir áherslur okkar, snúum okkur síðan við og mætum mjög samhent á fund með fulltrúum stærstu alþjóðastofnana í heimi (Forseti hringir.) og erum sammála. Við erum sammála um áhersluna. (Forseti hringir.) Á því byggir norrænt samstarf.