alþjóðleg þróunarsamvinna Íslands o.fl.
Herra forseti. Mig langar að þakka hv. þingmanni fyrir góða ræðu. Ég hef verið að lesa aðeins umsögnina sem kemur úr fjármála- og efnahagsráðuneytinu. Þar segir, með leyfi forseta:
„Megintilgangur frumvarpsins er að stuðla að aukinni skilvirkni og hagkvæmni í stjórnsýslu alþjóðlegrar þróunarsamvinnu Íslands og gera stefnumótun málaflokksins markvissari.“
Enn fremur segir: „Talið er að með breytingunum náist betri heildarsýn yfir málaflokkinn, auðveldara verði að móta stefnu og áherslur Íslands í honum og hrinda stefnunni í framkvæmd með markvissari og hagkvæmari hætti.“
Mig langar að spyrja hv. þingmann hvort hann sé sammála þeirri greiningu og ef ekki, hvers vegna?