stjórn veiða á Norðaustur-Atlantshafsmakríl.
Frú forseti. Ég vil endurtaka það sem ég kom aðeins að í lokin áðan og það er með þróun vinnslunnar, sem ég hef verið mjög spenntur að fylgjast með. Þar skipta strandveiðarnar einmitt mjög miklu máli. Það hafa allmargir aðilar spreytt sig á því að taka við makríl til vinnslu, til frystingar, til reykingar, af krókaskipunum. Meðferð hráefnisins þar er á köflum mjög góð og margir segja að það sé besta og stinnasta hráefnið sem þeir fá, nánast spriklandi ferskur, nánast lifandi makríll beint af krókum og inn í vinnslu. Ég held að það eigi að leyfa því að þróast áfram og það eigi ekki að loka það af mjög mikið.
Það er mjög afdrifarík ákvörðun að loka svona dæmi og útdeila réttindunum varanlega. Ef við horfum aftur í tímann hafa menn vissulega gert það með ýmsu móti, en það hefur alls ekki alltaf verið þannig að eingöngu veiðireynsla einhvers eins hóps hafi ráðið. Tökum norsk-íslensku síldina, þegar menn fundu flóknar formúlur sem tóku að hluta til mið (Forseti hringir.) af stærð og afkastagetu skipanna allra, ekki aðeins þeirra sem höfðu veitt að undanförnu. Það eru því mörg sjónarmið (Forseti hringir.) og menn verða að einhverju leyti að horfa til greinarinnar í heild ef þeir vilja leita jafnræðis eða sanngirni í þessu.