áætlun um vernd og orkunýtingu landsvæða.
Frú forseti. Það hefur komið fram að það ríki ekki traust, hvorki af hálfu hæstv. umhverfisráðherra né hv. þm. Páls Jóhanns Pálssonar, til þeirra faghópa sem skiluðu áliti til okkar í atvinnuveganefnd um að Þjórsá væri ekki fullrannsökuð og þær mótvægisaðgerðir sem Landsvirkjun ætlaði að notast við þar. Þar ríkir líka vantraust gagnvart verkefnisstjórn 3. áfanga og gagnvart umhverfis- og auðlindaráðuneyti. Það er með ólíkindum að heyra hæstv. umhverfisráðherra tala á þessum nótum og líka hv. þm. Pál Jóhann Pálsson sem hélt framsögu áðan um málið. Það er ekki boðlegt að hafa þetta mál á dagskrá þegar verið er að lýsa algeru vantrausti á faghópa (Forseti hringir.) og verkefnisstjórnir sem eru skipaðar hér.
Er boðlegt að hafa þetta á dagskrá hérna enn og halda áfram að ræða málið á þessum (Forseti hringir.) nótum? Mér finnst það ekki.