ummæli sjávarútvegsráðherra og sameining skóla.
Frú forseti. Ég kem hingað upp til þess að taka undir með þeim hv. þingmönnum sem talað hafa um þetta mál. Ég hef miklar áhyggjur af því hvernig staðan er í menntamálum og hvernig hæstv. menntamálaráðherra fer fram. Ég efast ekki um að honum gengur gott eitt til, en það stendur í stefnuyfirlýsingu ríkisstjórnarinnar að hún ætli að leggja áherslu á að efla menntakerfið með hagsmuni nemenda og þjóðarinnar allrar að leiðarljósi og að hún ætli að gera það í nánu samráði við alla hagsmunaaðila.
Er Alþingi ekki hagsmunaaðili þegar kemur að menntastefnu þjóðarinnar? Ég velti því fyrir mér. Það er alveg sama hvar drepið er niður í menntamálum — það er hvítbókin, það er menntamálastofnun og nú þessar sameiningar skóla — ekkert samráð er haft við fólk, ekki eitt einasta. Mér finnst það mjög alvarlegt. Við eigum að fá að taka þátt í því hér í þinginu.