fyrirkomulag náms til stúdentsprófs.
Hæstv. forseti. Ég þakka þessa umræðu. Það kemur ekki fram hjá hæstv. ráðherra að hann hafi umboð til þess að ákveða fyrst hvað gera skuli og svo megi ræða málin eftir á þegar ákvörðun liggur fyrir, en það er dapurlegt að fylgjast með því að hæstv. ráðherra er að keyra menntamálin hér í bullandi ágreining, málaflokk sem þarf ekki að vera í ágreiningi og hefur lengstum ekki verið það. Það er engin menntastefna nema menntastefna hæstv. ráðherra og skilaboðin sem berast inn í þingið eru í gegnum fjárlög, jafnvel með nefndarálitum frá meiri hluta fjárlaganefndar eða með tilvísun í hagræðingarhóp sem kom með 111 tillögur sem ekki hafa verið ræddar í þinginu á einn eða neinn hátt.
Við höfum ekki fengið nein svör um það hvernig stytting náms muni bitna á nemendum. Hvaða greinar falla niður, eru það íþróttir og list- og verkgreinar? Hvaða áhrif hefur þetta á framhaldsskólana á landsbyggðinni sem eru í miklum vandræðum? Við vitum að það eru hugmyndir um sameiningar. Hvernig eiga þær að birtast? Framhaldsdeildir eru í uppnámi. Það er ekki búið að ákveða hvernig iðn- og starfsnám á að koma út í þessari styttingu. Það eru engar formlegar tillögur eða umræður komnar varðandi það.
Það sem mig langar þó aðallega að gera að umtalsefni er nýleg rannsókn sem birtist í Vísi og var vitnað í í gær þar sem Sigrún Harðardóttir, lektor við félagsráðgjafadeild Háskóla Íslands, vekur athygli á því að brottfallið í framhaldsskólum er fyrst og fremst hjá nemendum í almennum deildum. Að mestu leyti er eðlileg námsframvinda hjá öllum hinum. Þetta er til dæmis eitt af því sem þyrfti að ræða og skoða í staðinn fyrir að koma alltaf hingað með sömu tölurnar úr misgömlum OECD-skýrslum. Er þetta tilfellið eins og viðkomandi kona, Sigrún Harðardóttir, segir, með leyfi forseta:
„Eins og staðan er í dag þá er ekki bara um að ræða brotthvarf úr námi heldur má segja að skólarnir stundi ákveðið brottkast á ákveðnum hópi nemenda sem slakast standa við lok grunnskóla.“
Þá spyr maður: Er þetta aðferðin sem á að nota til að minnka brottfall, þ.e. með því að útiloka þá nemendur sem lakast standa og koma þeim í eitthvert annað kerfi? (Forseti hringir.) Það eru svona hlutir sem við viljum fá að ræða hér. Við viljum líka fá að ræða um Iðnskólann í Hafnarfirði þegar menn vísa í að það sé lögleg aðgerð af því (Forseti hringir.) að ósk um heimild komi seinna inn í þingið þegar skólinn hefur þegar tekið til starfa. Ég óska eftir því að sú sérstaka umræða sem hefur verið (Forseti hringir.) boðuð eða óskað eftir um það mál verði fljótt á dagskrá.