áætlun um meðferð og ráðstöfun aflamagns sem dregið er frá heildarafla.

Hæstv. forseti. Nei, ég er ekki hlynnt því að það sé fullkomlega opið og óheft. Það má setja mjög skýrar reglur um hámarksaflahlutdeild og slíkt um slíkan markað rétt eins og við höfum í dag.

Margar atvinnugreinar búa við það að þurfa að bjóða í aðföng sín á markaði ef um er að ræða einkaleyfi af einhverju tagi. Það hlýtur að vera markmiðið að það sé einhvers konar ballans á milli þess að hámarka arðsemi okkar af þeim auðlindum sem við eigum á móti því að koma í veg fyrir óeðlilega samþjöppun í greininni og óeðlilega stöðu í samkeppni; rétt eins og á matvörumarkaði þar sem ákveðnar verslanir hafa í krafti stærðar og dreifingar getað náð lægra vöruverði en eru síðan komnar í þannig markaðsráðandi stöðu að geta farið að stjórna vöruverði, og það ekki endilega neytendum til hagsbóta. Þar koma samkeppnisyfirvöld inn í og löggjafinn. (Gripið fram í.)

Ef til þess kemur, sem ég ætla rétt að vona, að við breytum þessu kerfi þannig að auðlindir landsins verði lýstar þjóðareign í stjórnarskrá og fyrir notkun þeirra komi fullt verð þurfa samkeppnisyfirvöld að vera þar viðloðandi og ríkisvaldið að setja skýrar leikreglur á þeim markaði.