stöðugleikaskattur.

Herra forseti. Ég vil líka þakka hv. þm. Frosta Sigurjónssyni fyrir framsöguna og hans góðu vinnu í nefndinni. Ég get sagt það alveg hreinskilnislega að ég hef ýmsar efasemdir um þá leið sem virðist vera niðurstaðan. Ég get hugsanlega lifað með því vegna þess að ég treysti hinum krítísku augum hv. þm. Frosta Sigurjónssonar. Ég átti kost á því að vera einn dag með honum í nefndinni og mér féllu vinnubrögð hans ákaflega vel. Það vildi ég nú segja.

Ég lýsti á sínum tíma eindregnum stuðningi við stöðugleikaskattinn þegar hann kom fram. Hann byggði á þeirri hugmyndafræði sem ég þekkti og hafði verið unnið eftir, að krónueignin í slitabúunum yrði rýrð og það er mjög auðvelt að skilja þá hugmyndafræði. Það var hins vegar ekki fyrr en búið var að kynna hana á fundunum í Hörpu sem í ljós kom að það var önnur leið sem kröfuhafar gátu líka farið. Í reynd, eins og fram kom í andsvari hjá hv. þm. Frosta Sigurjónssyni, virtist hún vera byggð á hugmyndum stærstu kröfuhafanna, hv. þingmaður sagði það bókstaflega. Það kemur í ljós að þá sleppa þeir gagnvart Íslendingum að því marki að fjármálalegur stöðugleiki er tryggður samkvæmt báðum leiðunum en í annarri leiðinni sleppa þeir með hugsanlega 400 milljörðum kr. minna. Mér finnst ekkert óhreint eða óeðlilegt við að Íslendingar velti því fyrir sér hvort æskilegt væri að fara þá leið, sérstaklega vegna þess að sú leið er samkvæmt hinum svokölluðu stöðugleikaskilyrðum mjög óljós. Ég á mjög erfitt til að komast til botns í þeirri leið. Ég hef reynt það, reynt að skýra það fyrir sjálfum mér og í samtölum við aðra, en ég fullyrði að það eru mjög fáir þingmenn í þessum sal sem skilja það til hlítar.

Spurningin sem ég hef til hv. þingmanns er þessi: Skiptir það einhverju máli? Er ekki bara búið að ákveða hvora leiðina menn ætli að fara? Þeir ætla ekki að fara stöðugleikaskattsleiðina. Þeir ætla að fara leið stöðugleikaskilyrða og framlags. Er ekki verið að stilla Alþingi hér upp fyrir fram ákveðnum hlut?