framtíðargjaldmiðill Íslands.

Herra forseti. Ég held að fólki beri nú saman um að kreppan í Evrópu er ekki gjaldmiðilskreppa. Þó að Grikkland eigi í erfiðleikum er ekki hægt að segja að það sé kreppa gjaldmiðilsins sem slíks.

Mér finnst mikilvægt að við ræðum hér kjör almennings í landinu. Hvernig fer krónan með heimilin í landinu? Hvernig fer þessi minnsti sjálfstæði gjaldmiðill í heimi með íslensk heimili? Við höfum horft á það hvernig það er gert. Reglulega erum við, almenningur í landinu, slegin niður og tekinn af okkur samningur. Við semjum ekki um okkar kjör, það er krónan sem sér um að slá þau niður. Það er ekki hagur almennings sem þar er undir heldur er það hagur útflutningsgreinanna í landinu.

Auðvitað er þetta sambland, þetta er flókið dæmi, en ég vil að við ræðum í alvöru hvernig staða okkar gæti orðið betri með því að taka upp evru, af hverju það er betra fyrir íslensk heimili. Og ef menn komast að því að það sé ekki betra, af hverju það sé. Við gerum það ekki á einhverju tilfinningaplani, heldur þurfum við að byggja það á staðreyndum, meðal annars á þessari skýrslu sem Seðlabankinn vann. Hún er ágæt og yfirgripsmikil þó að sannarlega megi gera við hana viðauka, ég er ekki að neita því. En að við reynum að byggja þetta á staðreyndum og horfa til dæmis á myntbandalagið í heild sinni, (Forseti hringir.) kosti þess og galla, en ekki aðeins á eitt ríki sem á í (Forseti hringir.) miklum erfiðleikum eins og Grikkland núna.