tekjuskattur o.fl.

Virðulegi forseti. Það er gaman að þingmaðurinn hæðist að því þegar þessi þrotabú voru færð yfir til kröfuhafanna, þessi þrotabú. En það skal upplýst hér að ég legg fram á þingflokksfundi framsóknarmanna á morgun þingsályktunartillögu sem felur í sér að farið verði í rannsókn á einkavæðingu bankanna hinna síðari, rannsókn sem snýr að því að þegar bankarnir voru færðir yfir til kröfuhafa á einni nóttu án þess að nokkurt verðmat lægi fyrir.

Hér fór þingmaðurinn yfir Landsbankabréfið sem þvældist mjög inn í Icesave-málið. Sem betur fer hafði íslenska þjóðin sigur í Icesave-málinu hjá EFTA-dómstólnum. Hér gagnrýnir þingmaðurinn að verið sé að setja það inn í þetta stöðugleikaframlag. Það er vegna þess að skuldabréfið var tekið í erlendum gjaldeyri sem ekki var til í landinu á þessum tíma. Hér er því verið að einfalda hlutina mikið.

Mig langar að lokum að spyrja: (Forseti hringir.) Hver var stefna Vinstri grænna fyrir alþingiskosningarnar árið 2013 í málefnum kröfuhafanna þar sem Framsóknarflokkurinn var sakaður um blekkingar og lygar varðandi það að hægt væri að sækja þessar kröfur til kröfuhafanna?