væntanleg íbúakosning í Reykjanesbæ.

Frú forseti. Ég vil taka fram í upphafi að eitthvað kann af þessari fyrirspurn að vera orðið úrelt sökum þess að hún hefur legið hér inni um alllangt skeið, en ég fer yfir það á eftir í máli mínu.

Fyrirhuguð er íbúakosning í Reykjanesbæ um kísilver sem þar á að rísa. Að vísu hefur það verið svo að meiri hlutinn í bæjarstjórn hefur sagt að hann muni ekki endilega hlíta niðurstöðum íbúakosningarinnar, en til hennar er boðað að frumkvæði íbúa í samræmi við ákvæði tiltölulega nýrra sveitarstjórnarlaga. Við höfum rætt mikið á Alþingi undanfarin ár, allt frá hruni, um nauðsyn þess að við styrkjum betur beint lýðræði og aðkomu borgaranna að ákvarðanatöku. Til þess eru ýmsar leiðir. Íbúakosning er ein af þeim. Ástæðan fyrir því að sveitarstjórnarlögin voru samþykkt með þeim ákvæðum sem í þeim eru á sínum tíma var meðal annars sú að búa til slíka farvegi þannig að íbúar geti haft áhrif á nærumhverfi sitt, t.d. með þessum hætti.

Þess vegna hefði ég talið að mikilvægt væri hvernig til tækist núna þegar þessu ákvæði er komið í framkvæmd. Að vísu heyri ég það, og fer ég á fundi víða, að fólk úti um land horfir til þessa ákvæðis en hefur líka áhyggjur af því að ákvæðið sé í sjálfu sér marklaust því að um sé að ræða ráðgefandi kosningu en ekki bindandi og þess vegna taki því ekki að efna til íbúakosninga. Þetta finnst mér umhugsunarefni.

Þegar við höfum verið að ræða þjóðaratkvæðagreiðslur, sem eru einhvers konar stór gerð af íbúakosningu, þá gilda um þær ákveðin lög, skýrar reglur, sem lúta að því hvernig eigi að undirbúa þjóðaratkvæðagreiðsluna, hvaða farvegi menn hafi, sem standa fyrir andstæð sjónarmið í slíkri atkvæðagreiðslu, til að koma sjónarmiðum sínum á framfæri. Það skiptir miklu máli um hvað er spurt í þjóðaratkvæðagreiðslu. Þetta eru allt álitamál. Ef það verður, sem ég ræddi hér fyrr í dag, af stjórnarskrárbreytingu sem gerir ráð fyrir að tiltekinn hluti landsmanna geti krafist þjóðaratkvæðagreiðslu skiptir miklu máli að við tökum þessa umræðu líka um framkvæmd og útfærslu á slíkum kosningum.

Innanríkisráðuneytið fer með málefni sveitarstjórnarmála. Mig langar að spyrja hver aðkoma ráðuneytisins sé í undirbúningi og framkvæmd þessarar kosningar og hvort bera þurfi fyrirkomulag hennar undir ráðuneytið til samþykktar. Enn fremur hvort ráðuneytið muni hafa eftirlit með framkvæmd íbúakosningarinnar til að tryggja að staðið verði rétt að framkvæmd hennar. Og að við kynningu á kosningunni hafi íbúar Reykjanesbæjar aðgang að öllum upplýsingum. Þetta varðar það sem ég nefndi áðan.

Að lokum er sú spurning sem í raun og veru er úrelt frá því fyrirspurnin var lögð fram, því að mér skilst að nú sé búið að breyta spurningunni. Upphaflega var gert ráð fyrir að það væri sérstakur valkostur að hafa ekki skoðun, sem væri mjög óvenjulegt í svona atkvæðagreiðslu, en nú skilst mér að búið sé að breyta henni. En (Forseti hringir.) um þetta snúast spurningarnar, frú forseti.