afturvirk hækkun bóta.

Virðulegi forseti. Ég ætla að endurtaka það sem ég sagði af því að svo virðist sem hv. þingmaður hafi ekki skilið það sem ég sagði um það hvað felst í þeirri hækkun sem kemur fram í tillögum okkar í meiri hlutanum. Hækkunin tekur mið af endurmetinni þjóðhagsspá Hagstofu Íslands í nóvember um þróun launavísitölu að frádregnu launaskriði. Það er hækkun á meðaltöxtum, bæði á yfirstandandi ári og því næsta. Ég veit að hv. þingmaður ætti að geta skilið þetta. Í því felst að meðallaunahækkun ársins 2015 umfram 3% hækkun bóta almannatrygginga í byrjun þessa árs er innifalin í hækkuninni í fjárlögum ársins 2016.

Forgangsröðun þessarar ríkisstjórnar kemur líka skýrt fram í fjárlagafrumvarpinu. Þegar við lögðum það fram lögðum við áherslu á að hækka bætur. Bætur munu hækka um 14,2 milljarða 1. janúar 2016. Inni í þeirri tölu eru 3,9 milljarðar sem eru afturvirk hækkun vegna launaþróunar á árinu. Það bætist ofan á þá 4,3 milljarða sem aldraðir og öryrkjar fengu í janúar 2014 en ekki aðrir. Við munum síðan áfram, eins og gagnvart (Forseti hringir.) öllum þjóðfélagshópum í samfélaginu, standa að því að bæta kjör þessara hópa. Það höfum við gert, það höfum við sýnt.