fjárlög 2016.
Herra forseti. Það má kannski segja það að maður fær ekki það sem maður vill og vill ekki það sem maður fær þegar maður sér hæstv. utanríkisráðherra mættan hérna á svæðið, af því að við þingmenn vorum nú í þetta skiptið, með fullri virðingu fyrir hæstv. utanríkisráðherra, að óska eftir hæstv. heilbrigðisráðherra, fjármálaráðherra, félagsmálaráðherra og menntamálaráðherra til að ræða við þá um þá málaflokka sem brenna á okkur.
Einhver misskilningur hefur verið á ferðinni. Ég kem næst í ræðu og vildi gjarnan hafa þessa ráðherra í salnum, eins og örugglega fleiri sem á eftir koma, til að fjalla um þessi stóru og miklu mál sem brenna á öllum í þjóðfélaginu. Við erum ekki einangruð í þessari umræðu. Öll þjóðin fylgist með hvað er í gangi. Ætlar ríkisstjórnin virkilega ekki að gefa neitt eftir? Ætlar hún bara að halda áfram að rótast eins og naut í flagi í þessu máli?