þriðja kynslóð farsíma.
Virðulegi forseti. Ég mæli fyrir nefndaráliti umhverfis- og samgöngunefndar um frumvarp til laga um brottfall laga um þriðju kynslóð farsíma, nr. 8/2005. Nefndin hefur fjallað um málið og fengið á sinn fund Veru Sveinbjörnsdóttur frá innanríkisráðuneyti og Björn Geirsson og Þorleif Jónasson frá Póst- og fjarskiptastofnun. Þá bárust nefndinni þrjár umsagnir um málið frá IMC Íslandi ehf., Nova og Póst- og fjarskiptastofnun.
Með frumvarpinu er verið að leggja til að lög um þriðju kynslóð farsíma falli brott. Í þeim lögum er kveðið á um úthlutun ákveðinna tíðna til starfrækslu farsímaneta og um kvaðir um lágmarksútbreiðslu. Þá er einnig kveðið á um tíðnigjald og útboð til að fá úthlutað tíðnum. Lögin einskorðast við þriðju kynslóð farsíma og því eru tíðnir sem mælt er fyrir um í lögunum fráteknar fyrir þá tækni. Frá því að lögin voru sett hefur orðið mikil framþróun í farsímatækni og fjórðu kynslóðar farsímatækni hefur orðið meira áberandi. Tilgangur og markmið frumvarpsins með brottfalli laga um þriðju kynslóð farsíma er að gera tíðnisvið tæknilega hlutlaust eins og það er á EES-svæðinu og mæta þannig alþjóðlegum skuldbindingum og þörfum markaðarins. Með því að gera tíðnisviðið tæknilega hlutlaust má líka nota ólíka farsímatækni, 2G, 3G eða 4G, yfir sama sendinn séu sömu tíðnibönd notuð. Með brottfalli laganna munu almenn ákvæði um fjarskipti, í lögum nr. 81/2003, og líka ákvæði reglugerðar nr. 1047/2011, um skipulag og úthlutun tíðna í fjarskiptum, gilda um úthlutun þeirra tíðna sem nú falla undir þau lög sem verið er að leggja til að verði felld úr gildi. Það felur meðal annars í sér að hægt verður að notast við uppboð í stað útboðs þegar tíðnum er ráðstafað og ekki verður þörf á kvöðum um lágmarksútbreiðslu sem þegar hefur verið náð.
Í athugasemdum við frumvarpið er ítarlega fjallað um áhrif þessara laga og hvaða áhrif það muni hafa að fella þau úr gildi. Almenn sátt er um efni frumvarpsins og í athugasemdum við frumvarpið kemur fram að við samráð Póst- og fjarskiptastofnunar, um framtíðarnýtingu tíðnisviða fyrir næstu kynslóða farnetsþjónustu, þar með talið 2100 MHz tíðni, sem fellur undir lög nr. 8/2005, kemur fram að allir hagsmunaaðilar voru sammála um að ekkert mælti á móti því að fella lögin úr gildi og flestir hagsmunaaðilar mundu sækja um lausar tíðnir á sviðinu í framhaldinu.
Í ákvæði til bráðabirgða er kveðið á um að tíðniheimildir sem gefnar hafa verið út á grundvelli laganna haldi gildi sínu til loka gildistíma heimildanna, eða til 30. mars 2022. Þannig munu skilmálar og kvaðir sem felast í heimildunum halda gildi sínu þann tíma, meðal annars kvaðir um útbreiðslu þjónustunnar.
Við í nefndinni leggjum til að frumvarpið verði samþykkt óbreytt. Birgir Ármannsson og Ásta Guðrún Helgadóttir voru fjarverandi við afgreiðslu málsins en undir þetta rita sú sem hér stendur, Katrín Júlíusdóttir framsögumaður, Höskuldur Þórhallsson, formaður nefndarinnar, Haraldur Einarsson, Elín Hirst, Svandís Svavarsdóttir, Róbert Marshall og Vilhjálmur Árnason, hv. þingmenn í umhverfis- og samgöngunefnd.
