dagur helgaður fræðslu um mannréttindi barna.

Virðulegi forseti. Ég þakka hv. þm. Páli Val Björnssyni kærlega fyrir að vera 1. flutningsmaður þessa máls og þakka honum líka fyrir að vekja athygli mína á málinu þannig að ég gat verið meðflutningsmaður, ég er mjög sátt við það.

Hér á Alþingi er starfandi, eins og hann sagði, þingmannahópur sem hefur það að meginverkefni að passa upp á málefni sem tengjast börnum og ungmennum. Eitt af því sem við teljum að sé mikilvægast í þeim efnum þótt af mörgu sé að taka — og á morgun verða sérstakar umræður um stöðu barna í samfélaginu — er einmitt það sem kemur fram í þingsályktunartillögu hv. þingmanns, að börnin fái fræðslu um réttindi sín.

Þessi þingsályktunartillaga er þverpólitísk og það eru allir, sem að þessum málum koma úti í samfélaginu, sammála um að það sé grundvallaratriði fyrir barn — til að geta staðið með sjálfu sér og látið vita ef ekki er allt í lagi í kringum það — að það viti hvaða rétt það hafi. Þessi réttur er mjög skýr, samkvæmt barnasáttmála Sameinuðu þjóðanna. Það er því afskaplega mikilvægt að við fáum þetta samþykkt á þessu þingi þannig að þetta geti komist á laggirnar strax í vetur 20. nóvember, að börn fái á þessum degi uppfræðslu um réttindi sín samkvæmt barnasáttmála Sameinuðu þjóðanna.