skattar og gjöld.

Virðulegi forseti. Ég ætla nú ekki að fara að gera lítið úr skattalækkunum sem hæstv. ráðherra hefur staðið fyrir og ég hef stutt eindregið, er alveg með honum í því. En mig langaði bara til að benda á þetta af því að ég veit að það situr í sjómönnum að það er ekki lengra síðan en á síðasta kjörtímabili, hvort það var ekki þá, að sjómannaafslátturinn var tekinn af þeim. Þetta er svolítið sálrænt, þetta voru ekki góð skilaboð og fóru illa í menn sem og sú staðreynd að aðrir sambærilegir hópar fá ákveðna ívilnun vegna dagpeninga meðan þeir fá ekki neina ívilnun á sambærilegar greiðslur, sem eru fæðispeningar.

En ég hvet nefndarmenn til að skoða þessi mál. Ég held að það séu flestir sammála um að þetta bitnar á sjómönnum, að geta ekki samskattað, þess vegna var mjög ánægjulegt að samþykkja síðastliðið haust að til stæði að gefa þessum aðilum kost á því að nýta skattafslátt hjá maka. Þannig að ég skora á hv. nefndarmenn í efnahags- og viðskiptanefnd að taka þetta til athugunar og treysti því að ráðherra sýni þeim skilning.