tímabundnar endurgreiðslur vegna kvikmyndagerðar á Íslandi.

Virðulegur forseti. Það er einmitt brýnt að árétta það sem hæstv. ráðherra nefndi, um hverslags endurgreiðslur er að ræða.

Virðulegur forseti. Lögin heita lög um tímabundnar endurgreiðslu vegna kvikmyndagerðar og nafnið er kannski svolítið villandi vegna þess að menn gætu haldið að hér væri verið að endurgreiða mönnum eitthvað úr ríkissjóði sem skattgreiðendur eða ríkissjóður hefur tekið áður af mönnum sérstaklega. Það er nefnilega ekki um það að ræða. Það er um miklu víðtækari endurgreiðslur að ræða. Það er hreinlega verið að endurgreiða allan framleiðslukostnað sem til fellur við framleiðslu kvikmyndar eða sjónvarpsefnis hér á landi eins og sagt er í 2. gr. laganna. Við útreikning á endurgreiðslu er þannig tekið mið af heildarframleiðslukostnaði kvikmyndar. Á því er ekkert þak. Ég velti því fyrir mér hvort ekki sé rétt að hafa þak á þeirri endurgreiðslu ef menn eru sannfærðir um að hún sé nauðsynleg, sem er ekki. Þess utan vil ég benda á að þeir sem starfa við kvikmyndagerð, Íslendingar, og njóta að sjálfsögðu góðs af þeirri ívilnun sem um er að ræða, eru í samkeppni við aðra á Íslandi sem ekki njóta slíkrar ívilnunar. Ég tek sem dæmi hótelrekstur sem leigir út til erlendra aðila og sá kostnaður fæst endurgreiddur. Hann er í samkeppni við aðra hótelrekendur. Fólk sem vinnur við að farða í kvikmyndageiranum er líka í samkeppni við aðra sem farða sem eru kannski ekki í kvikmyndageiranum en annars staðar og þar fram eftir götunum. Það er þess vegna sem ég spyr hvort ekki sé eðlilegt að það sé gert opinbert um hvers lags reikninga er að ræða sem hinir erlendu aðilar eða íslenskir leggja til við ríkið að skattgreiðendur endurgreiði þeim.