störf þingsins.

Virðulegur forseti. Ísland er kraftmikið samfélag og þegar tekst að ná fram samtakamætti þjóðarinnar er ótrúlegt hvað við afrekum. Þetta gerðist við stofnun lýðveldisins, útfærslu landhelginnar, þetta sáum við í kjölfar efnahagshrunsins 2008. Alþingi er mikilvægur þáttur af íslensku samfélagi, íslenskri stjórnskipan. Þetta er löggjafarvaldið á Íslandi og við höfum séð að Alþingi getur unnið vel saman. Hér voru neyðarlögin sett sem voru upphafið að endurreisn landsins eftir hrunið. Fyrir skemmstu samþykktum við ný náttúruverndarlög í breiðri sátt. Við eigum von á nýjum útlendingalögum inn í þingið sem hafa verið unnin í breiðri sátt. Þetta er hægt.

Mér varð hugsað til þess í gær þegar hæstv. fjármálaráðherra svo gott sem hvæsti á þingið að það kæmi stjórnarandstöðunni ekki við hvenær yrði kosið í haust. Ný ríkisstjórn hefur séð ástæðu til þess að tilkynna að kjósa eigi í haust en alla vega ekki enn þá ákveðið að tilkynna okkur hvenær kjördagur verður.

Þetta „ég á þetta, ég má þetta“-hugarfar veldur mér hugarangri vegna þess að það er merki um að völdin skipti meira máli en heildin. Íslenskt samfélag er í sárum eftir það sem hefur gerst og komið fram síðustu vikur. Það er ekki tími valdsmannsins og þess sem á heldur tími almennings alls, þjóðarhags. Þess vegna segi ég að (Forseti hringir.) við á Alþingi verðum að sjá kjördag, við verðum að sjá þessa mikilvægu málaskrá sem ríkisstjórnin þarf að leggja fram því að þangað til er þetta Alþingi verklaust og engum til gagns.