viðbrögð stjórnvalda við skattaskjólum.
Herra forseti. Ég þakka hæstv. ráðherra fyrir að eiga þessa sérstöku umræðu um aðgerðir gegn skattaskjólum og viðbrögð stjórnvalda við þeim. Eins og við vitum sem höfum tekið þátt í umræðunni á Alþingi undanfarna daga og umræðunni í samfélaginu virðist hafa komið mörgum Íslendingum á óvart hversu mörg aflandsfélög í skattaskjólum eru tengd Íslendingum, ef marka má þær fréttir sem hafa borist okkur í gegnum Panama-skjölin. Mikið hefur verið rætt um eðli þessara félaga að undanförnu. Eins og kunnugt er snúast þau ekki eingöngu um að komast hjá skattgreiðslum heldur geta verið ýmsir aðrir kostir í því fyrir þá sem eiga eignir í slíkum aflandsfélögum og kannski fyrst og fremst þeir að það hvílir leynd yfir eignarhaldi og félögin eru staðsett í allt öðru regluverki en á við til dæmis á Íslandi. Þeir sem tala fyrir skattaskjólum úti í heimi, ef maður kynnir sér hina alþjóðlegu umræðu, benda sumir hverjir á, fylgjendur skattaskjóla, að þau geti verið liður í því að auka samkeppnishæfni vestrænna fyrirtækja, en þeir sem berjast gegn þessu, og það eru æ fleiri, segja að þetta grafi undan velferðarsamfélögunum, þetta grafi undan heilbrigðu atvinnulífi í heimalandinu.
Það eru æ fleiri á alþjóðlegum vettvangi sem hafa skorið upp herör gegn skattaskjólum. Barack Obama hefur gert það, OECD hefur gert það, Ísland hefur þar skrifað undir skuldbindingar um að berjast gegn skattaskjólum. Norræna ráðherranefndin hefur lýst þessu yfir. Og af hverju? Jú, af því að skattaskjólin snúast ekki aðeins um að koma sér hjá skattgreiðslum, þau snúast líka um að ekki allt atvinnulíf er látið lúta sömu reglum, sömu kröfum og það skekkir auðvitað líka samkeppnisstöðuna í heimalandinu.
Ég held að mjög mikilvægt sé að við reynum að ræða þessi mál á Alþingi, hvað við erum reiðubúin að gera og hvað við getum gert til að taka virkan þátt í þessari baráttu. OECD hefur sett fram áætlun sem er kölluð BEPS-aðgerðaáætlun og stendur það fyrir Base Erosion and Profit Shifting og snýr að aðgerðum gegn rýrnun skattstofns og tilfærslu hagnaðar. Þetta er mjög aðgerðamiðuð áætlun í mörgum aðgerðum. Ísland hefur skrifað undir að það vilji taka þátt í þessu. Hér hafa verið innleiddar CFC-reglur, hér hafa verið gerðir 44 upplýsingaskiptasamningar sem snúast um að flæði upplýsinga sé eðlilegra um fjármagnið.
Það sem mig langar að spyrja hæstv. ráðherra út í er hvort hann telur að þetta mál eigi að hljóta meiri forgang í stefnumótun stjórnvalda, aukinn forgang í ljósi mikillar umræðu á alþjóðavettvangi, hvort hann hyggst standa fyrir aðgerðum af hálfu stjórnvalda á innlendum vettvangi og hvaða aðgerðum stjórnvöld hafa tekið þátt í á alþjóðlegum vettvangi, hvað hæstv. ráðherra finnst um þá tillögu sem við þingmenn Vinstri hreyfingarinnar – græns framboðs höfum lagt fram um að við á Alþingi stöndum fyrir rannsókn á aflandsfélögum í eigu Íslendinga og skattaskjólum og tökum málið þannig upp á það plan sem til dæmis hefur verið boðað í Frakklandi af hálfu forseta Frakklands, François Hollandes, sem hefur sagt: Þetta mál er svo umfangsmikið að það er mikilvægt að við tökum á því, ekki einungis innan stofnanakerfisins heldur líka á hinum pólitíska vettvangi, því að almenningur þarf að geta treyst því að stjórnmálin ætli að takast á við þennan vanda.
Mig langar líka að spyrja hæstv. ráðherra hvað hann telur að þurfi að gera, hvað sé hægt að gera til að breyta löggjöfinni. Nú hefur skattrannsóknarstjóri bent á að ýmislegt sé hægt að gera, t.d. gefa rýmri heimild til að áætla tekjur ef fullnægjandi gögn eru ekki lögð fram, þannig að embætti hafi í raun rýmri heimildir til að bregðast við því ef fullnægjandi gögnum er ekki skilað, að það séu jafnvel sett inn refsiákvæði ef fullnægjandi gögn eru ekki lögð fram, að fyrningartími endurákvörðunar sé lengdur og það sé líka sett refsiákvæði vegna ráðgjafarþjónustu í ljósi þess að aðilar sem nú veita ráðgjöf eða hafa milligöngu um stofnun aflandsfélaga kunni að gildandi lögum að bera refsiábyrgð. Hugsa má sér að það mætti skerpa á því ákvæði þannig að þessum ráðgjöfum verði gert skylt að skila skattrannsóknarstjóra upplýsingum um þá ráðgjöf sem þeir veita, en ekki bara að skattrannsóknarstjóri hafi núna heimild til að krefjast upplýsinga frá þeim.
Það liggur nefnilega fyrir að þó að margt hafi verið gert, bæði á alþjóðavettvangi og hér innan lands, er hægt að gera mun betur í því að berjast gegn þessu. Þar skiptir máli hvað við gerum heima og líka í alþjóðlegu samhengi. Ég held hins vegar að það sem mestu skipti í þessu sé að við fáum um það skýr, pólitísk skilaboð að Alþingi Íslendinga sé alvara í því að berjast gegn skattaskjólum, að Alþingi Íslendinga taki afstöðu, taki þessi mál til raunverulegrar (Forseti hringir.) umræðu og taki þannig raunverulegan þátt í þeirri umræðu sem á sér staða annars staðar á Vesturlöndum. Þetta snýst um það hvernig við rekum okkar vestrænu lýðræðis- og velferðarsamfélög.
