rannsókn á aflandsfélögum Íslendinga og skattundanskotum.

Hæstv. forseti. Ég þakka hv. þm. Kristjáni L. Möller fyrir jákvæð viðbrögð við ræðu minni. Það er gott að heyra að við séum sammála um meginmarkmið tillögunnar og uppleggið í henni. Ég hlustaði á ræðu hv. þingmanns hér áðan og er honum hjartanlega sammála um inntakið í tillögunni. Við getum treyst því að það er fullt af jákvæðum og góðum framsóknarmönnum, en ég hef ekki gert almenna könnun á því hver stuðningurinn er við tillöguna sem slíka í flokknum. Ég geri ráð fyrir því að hann sé á jákvæðum nótum. Mér finnst tillagan vel uppbyggð og samræmi er á milli aðgerða og markmiða. Ég les tillöguna þannig. Ég hef svo sem ekki heyrt það á neinum þeirra sem tekið hafa til máls í dag um tillöguna að þeir geti annað en stutt markmiðin og sjái ekkert því til fyrirstöðu að hún gangi til hv. stjórnskipunar- og eftirlitsnefndar til frekari umræðu.

Ég held að það sé mjög gagnlegt að draga það — mér finnst andinn í tillögunni þannig — upp á yfirborðið hvert umfangið er, hver áhrifin eru á íslenskt samfélag og fara betur yfir aðferðir og leiðir og heimildir þeirra nefnda sem hér eru ræddar. Ég trúi því að allir hv. þingmenn, hvar í flokki sem þeir standa, styðji þessa ágætu og góðu tillögu.