ákvörðun EES-nefndarinnar nr. 293/2015 um breytingu á XXII. viðauka við EES-samninginn.
Virðulegur forseti. Ég mæli fyrir nefndaráliti hv. utanríkismálanefndar um tillögu til þingsályktunar um staðfestingu ákvörðunar sameiginlegu EES-nefndarinnar nr. 293/?2015 um breytingu á XXII. viðauka við EES-samninginn sem felur í sér félagarétt.
Nefndin hefur fjallað um málið og fengið á sinn fund Bryndísi Kjartansdóttur frá utanríkisráðuneytinu og Hörpu Theodórsdóttur frá atvinnuvega- og nýsköpunarráðuneytinu.
Með tillögunni er, eins og hefur komið fram áður í þessum sal, leitað heimildar Alþingis til að staðfesta ákvörðun sameiginlegu EES-nefndarinnar um breytingu á viðauka er lýtur að félagarétti við EES-samninginn frá 2. maí 1992 og fella inn í samninginn tilskipun Evrópuþingsins og ráðsins um árleg reikningsskil, samstæðureikningsskil og tilheyrandi skýrslur tiltekinna tegunda fyrirtækja, um breytingu á tilskipun Evrópuþingsins og ráðsins og niðurfellingu tilskipana ráðsins. Upplesturinn er flókinn en þetta kemur betur fram í nefndarálitinu.
Umrædd tilskipun fjallar í stuttu máli um ársreikninga félaga af tiltekinni gerð og er ætlað að draga úr umsýslukostnaði lítilla og meðalstórra fyrirtækja, bæta viðskiptaumhverfi fyrirtækja og auka gæði og samanburðarhæfni þeirra upplýsinga sem birtar eru. Með tilskipuninni eru gerðar breytingar á stærðarmörkum fyrirtækja. Þetta var til sérstakrar umfjöllunar í nefndinni vegna þess hversu stórt hlutfall íslenskra fyrirtækja heyrir einmitt undir örfyrirtæki. Í tilskipuninni eru lítil, meðalstór og stór fyrirtæki skilgreind og þar eru ríkari kröfur gerðar til ársreikningsskila hjá stærri fyrirtækjum en þeim smærri. Í tilskipuninni er að finna sérstakan valkvæðan kafla um svokölluð örfyrirtæki eða örfélög. Ákveði aðildarríki að innleiða þann kafla gerir það þeim kleift að bæta enn frekar viðskiptaumhverfi allra minnstu fyrirtækjanna.
Á fundi hv. utanríkismálanefndar var þetta talsvert mikið rætt og kom fram að um 98% fyrirtækja á Íslandi teljist til lítilla fyrirtækja eða örfyrirtækja. Meiri hluti þeirra er meira að segja skilgreindur sem örfyrirtæki og falla um 80% fyrirtækja hér á landi undir þá skilgreiningu sem er auðvitað afar sérstakt og örugglega einstakt í því umhverfi sem þessi löggjöf nær til.
Innleiðing þessarar tilskipunar kallar því á breytingar á lögum nr. 3/2006, um ársreikninga, og rétt er að það komi fram að hæstv. iðnaðar- og viðskiptaráðherra hefur þegar lagt fram frumvarp þess efnis. Í því er að finna ákvæði um örfélög og þar með er stefnt að því sem ég hef áður kynnt að lögfesta hið valkvæða ákvæði tilskipunarinnar um að sérstakar reglur skuli gilda um svo lítil fyrirtæki.
Frumvarpið er nú til umfjöllunar í efnahags- og viðskiptanefnd.
Hv. utanríkismálanefnd hefur, eins og ég áður sagði, fjallað nokkuð ítarlega um málið á fundum sínum og leggur til að það verði samþykkt óbreytt.
Hv. þm. Vilhjálmur Bjarnason var fjarverandi við afgreiðslu málsins. Hv. þingmenn Össur Skarphéðinsson og Óttarr Proppé voru einnig fjarverandi en rita undir álit þetta samkvæmt heimild í 4. mgr. 18. gr. starfsreglna fyrir fastanefndir Alþingis. Undir álitið rita, auk þeirrar sem hér stendur, Karl Garðarsson, Frosti Sigurjónsson, Elín Hirst, Óttarr Proppé, Silja Dögg Gunnarsdóttir, Steinunn Þóra Árnadóttir og Össur Skarphéðinsson, allir hv. þingmenn utanríkismálanefndar utan Vilhjálms Bjarnasonar sem var fjarstaddur.
