störf þingsins.
Hæstv. forseti. Ég vil líkt og hv. þm. Páll Valur Björnsson gera mál Ezes Okafors að umtalsefni hér á Alþingi. Hv. þm. Páll Valur Björnsson fór ágætlega yfir mál Ezes en mig langar að halda áfram að ræða það því að þetta er því miður ekki í fyrsta skipti sem mál af þessu tagi skekur íslenskt samfélag. Það alvarlega er hins vegar að það virðist ekkert geta haft áhrif á Útlendingastofnun og verklag hennar. Hún virðist hreinlega líta á það sem verkefni sitt að halda sem flestum úti og nota til þess öll möguleg ráð.
Hæstv. ráðherra Ólöf Nordal hefur sagt, bæði í sjónvarpsþættinum Hæpinu — sem ég mæli með að allir horfi á því að þetta eru frábærir þættir — sem og þegar hún mælti fyrir nýjum útlendingalögum, að markmiðið sé m.a. að tryggja mannúðlega og skilvirka meðferð stjórnvalda í málefnum útlendinga.
Í sama sjónvarpsþætti, Hæpinu, sagði fulltrúi Útlendingastofnunar að verkefni þeirra væri að framfylgja stefnu stjórnvalda og ráðherra. Það hefur svo sannarlega ekki verið gert hér og mér finnst í því ljósi mjög ámælisvert að hæstv. ráðherra, Ólöf Nordal, hafi ekki látið ná í sig vegna þessa máls. Maður hlýtur að spyrja sig: Er ekkert að marka orð hæstv. ráðherra í þessum málaflokki eða fer Útlendingastofnun ekki eftir fyrirmælum yfirmanns síns? Hvort heldur er er þetta algjörlega (Forseti hringir.) óboðlegt og íslensku samfélagi til háborinnar skammar. Þessu þarf að breyta.
