störf þingsins.
Virðulegi forseti. Minnkandi kosningaþátttaka er áhyggjuefni sem hefur orðið alvarlegra núna í dágóðan tíma. Ýmsar tilgátur og kenningar eru um hvers vegna það sé. Í stuttu máli er algengasta skýringin sem ég heyri einfaldlega áhugaleysi á stjórnmálum. Ekki að það sé of erfitt eða flókið að mæta á kjörstað, það er bara einlægt áhugaleysi. Svo er mér sagt í það minnsta af fólki sem á að þekkja til.
Nú er sjálfsagt hægt að fara í langa og mikla umræðu um hvað sé hægt að gera í því. En ég tel að eitt af því sem gerir að verkum að fólk missir trúna á stjórnmálunum og að hluta til á lýðræðinu í kjölfarið sé að það upplifi að skoðanir þess skipti ekki máli, að það skipti ekki máli hvað það kjósi því að í raun ráði stórar öldur ferðinni fremur en eitt og eitt atkvæði.
Því mundi ég telja að leiðin fram á við til að öðlast trú á stjórnmálunum og lýðræðinu sjálfu væri að við einbeittum okkur að því í framtíðinni að gefa kjósandanum betri tækifæri til að hafa áhrif, beinlínis, á gang mála, ekki bara hvaða fólk situr hér inni eða í ríkisstjórn heldur líka til að þróa hugmyndir eins og um það hvernig almenningur gæti forgangsraðað fjármagni. Í stað þess að við séum hér að rífast um hina eða þessa skoðanakönnunina eða hvernig við lítum á forgangsröðunina þá eru til leiðir með nútímatækni til að setja fram gögn og staðreyndir á gagnlegan hátt. Það er til tækni í dag til þess að leyfa fólki að hafa einhver áhrif á þetta, ekki öll áhrif, ég er ekki að leggja til að fjárlög verði í höndum almennings, ég er bara að segja að það eru leiðir til að efla þátttöku almennings í ákvarðanatöku í dag. Við höfum aldrei haft betri og fleiri tækifæri til þess. Við eigum að nýta þau tækifæri frekar en að leyfa þessari vondu þróun að halda áfram mikið lengur.
