umræða um samgönguáætlun og fjarvera innanríkisráðherra.

Virðulegi forseti. Ég má til með að taka undir það sjónarmið sem hefur verið reifað hér af allmörgum, þ.e. jafnræði flokkanna til þess að komast í kosningabaráttuna og eiga samtalið við kjósendur, sem er líka skylda kjörinna fulltrúa í aðdraganda kosninga, mikilvæg skylda. Það gengur auðvitað ekki og er ekki nein sanngirni í því að stjórnarflokkarnir skuli taka sér leyfi og vald til að ræða við kjósendur, fara í kosningaferðalag og eiga fundi með kjósendum, á sama tíma og fulltrúum annarra flokka er ætlað að sitja hér að störfum í þágu Alþingis, störfum sem eru auk þess í fullkominni ráðleysu ef marka má það skipulagsleysi sem nú ríkir hér í þinginu, þar sem engin starfsáætlun liggur fyrir og engin samtöl eru í gangi milli forustumanna flokkanna og þingflokksformanna um hvert framhaldið eigi að vera. Þetta nær auðvitað engri átt, virðulegi forseti.