almannatryggingar o.fl.
Hæstv. forseti. Við greiðum hér atkvæði um gríðarlega stórt og mikilvægt mál til hagsbóta fyrir bæði aldraða og öryrkja. Hér er um að ræða 5,3 milljarða kr. aukningu inn í almannatryggingakerfið í kerfisbreytingar varðandi málefnum aldraðra þar sem m.a. króna á móti krónu skerðingu er hætt og bótaflokkar sameinaðir. 4,5 milljarðar fara í frítekjumörk á allar tekjur til aldraðra og öryrkja og 1 milljarður er settur í hækkanir bæði handa öldruðum og öryrkjum. Hins vegar er mjög mikilvægt að klára þær kerfisbreytingar sem unnið er að núna í velferðarráðuneytinu og klára umræður sem eru á milli öryrkja og velferðarráðuneytisins. Nauðsynlegt er að það verði sem fyrst. En ég ítreka að hér er verið að koma á móts við kröfur þess að eitthvað sé gert fyrir þá sem eru lægst settir í kerfinu, og það er ríkisstjórn Framsóknarflokksins og Sjálfstæðisflokksins svo sannarlega að gera.