viðbrögð við skýrslu um Kópavogshæli.

Frú forseti. Ég held að ég geti talað fyrir hönd okkar allra þegar ég segi að við séum öll slegin yfir upplýsingum og lýsingum sem komu fram í skýrslu vistheimilanefndar um aðbúnað og illa meðferð á börnum á Kópavogshæli. Mig langar að taka undir með þeim sem sagt hafa til að mynda í fjölmiðlum, svo sem með Gerði Aagot Árnadóttur, fyrrverandi formanni Þroskahjálpar, að það verði að taka þessa skýrslu og nota hana til þess að bregðast við í nútímanum. Þess vegna vil ég beina nokkrum spurningum til hæstv. félags- og jafnréttismálaráðherra, því að málin í nútímanum eru jú á hans könnu.

Ég vil spyrja hæstv. ráðherra hvort ráðuneytið hafi sett í gang vinnu til þess að bregðast við ábendingum sem eru settar fram í skýrslunni um það sem þarf að bæta í málaflokki fatlaðs fólks og hvað ráðherrann hyggist gera til að tryggja fötluðu fólki mannréttindi á öllum sviðum í samræmi við sáttmála sem Ísland er aðili að. Eins hvort ráðherra ætli að setja af stað rannsókn á ofbeldi gegn fötluðum börnum í samtímanum því að fjölmargar rannsóknir sýna að fötluð börn eru í meiri hættu á að verða beitt ofbeldi en önnur börn.