matvælaframleiðsla og matvælaöryggi.
Virðulegur forseti. Ég vil leyfa mér að þakka hv. þm. Silju Dögg Gunnarsdóttur fyrir að hefja þessa umræðu um matvælaöryggi og matvælaframleiðslu, hvort tveggja áleitin efni og umrædd í samfélaginu. Innlend matvælaframleiðsla stendur okkur nærri. Öll þekkjum við til ágætis íslenskra landbúnaðarafurða.
Samfylkingunni hefur oft verið álasað, með röngu, fyrir að vera óvinur bænda og jafnvel að tala holum hljómi máli landsbyggðar. Þetta er ekki rétt. Almennar áherslur okkar í landbúnaðarmálum hafa hins vegar verið þær að hverfa frá núverandi ráðslagi sem löngu hefur lifað sig og er helsi fyrir þessa góðu starfsstétt. Við jafnaðarmenn leggjum hins vegar áherslu á að stuðningur samfélagsins við greinina sé skilyrtur með kröfu um skynsamlega landnýtingu, dýravelferð, sjálfbærni og umhverfisvernd og að við horfum til reynslu annarra þjóða.
Virðulegur forseti. Ég leyfi mér í tengslum við þessa umræðu að vekja athygli á nýlega útkominni skýrslu og samstarfsáætlun á vegum norrænu ráðherranefndarinnar sem nær til ársins 2020 og snertir matvælaöryggi. Samstarfssviðið er fiskveiðar, fiskeldi, landbúnaður, skógrækt og matvælaframleiðsla. Norðurlönd búa yfir mjög ólíkum styrkleikum en í öllum löndunum eru þessir þættir afar mikilvægir fyrir efnahagslífið og Norðurlönd hafa ábyrgst að vinna að sjálfbærri nýtingu á lífrænum náttúruauðlindum sínum.
Sem neytendur gerum við strangar kröfur til matvælakerfisins. Það á að vera gagnsætt og tryggja neytendum hollan og öruggan mat. Þess vegna vilja norrænu löndin auka það samstarf sem fyrir er, m.a. um dýravelferð, neytendafræðslu, matvælaeftirlit og næringarstefnu. Þá ætla Norðurlöndin að nýta í auknum mæli sameiginlega styrkleika sína til að vinna norrænum hagsmunum brautargengi innan ESB og á alþjóðavettvangi. Þessari samstarfsáætlun og þessum skrefum ber að fagna. Þetta er enn ein rósin í hnappagat norrænnar samvinnu.