fullgilding fríverslunarsamnings milli EFTA-ríkjanna og Georgíu.

Virðulegi forseti. Ég mæli hér fyrir tillögu til þingsályktunar um heimild til handa ríkisstjórninni að fullgilda fyrir Íslands hönd fríverslunarsamning milli EFTA-ríkjanna og Georgíu sem undirritaður var 27. júní 2016 í Bern í Sviss.

EFTA-ríkin og Georgía hófu viðræður um gerð fríverslunarsamnings í september 2015 og lauk viðræðunum í febrúar 2016. Í samningnum er kveðið á um gagnkvæma niðurfellingu og lækkun tolla á iðnaðarvörur, sjávarafurðir og unnar og óunnar landbúnaðarvörur. Tollar munu þannig falla niður frá gildistöku samningsins á hvers kyns sjávarafurðir og iðnaðarvörur, sem fluttar eru út frá Íslandi til Georgíu. Sama á við um helstu landbúnaðarvörur sem framleiddar eru hér á landi til útflutnings. Samningurinn mun því bæta samkeppnisstöðu íslenskra útflytjenda sem flytja vörur sínar til Georgíu.

Aðildin er jafnframt liður í því sameiginlega verkefni EFTA-ríkjanna að bæta markaðsafkomu fyrirtækja þeirra að mörkuðum víðs vegar um heim. Að þessum samningi samþykktum hafa EFTA-ríkin sameiginlega gert 27 slíka fríverslunarsamninga við 38 ríki eða ríkjahópa.

Í þingsályktunartillögunni er gerð grein fyrir helstu efnisþáttum fríverslunarsamningsins. Þar kemur fram að samningurinn inniheldur m.a. ákvæði um vöruviðskipti, þjónustuviðskipti, rétt til stofnsetningar, verndun hugverkaréttar, opinber innkaup, svo og viðskipti og sjálfbæra þróun.

Útflutningur frá Íslandi til Georgíu hefur verið lítill í gegnum tíðina, en hann hefur þó aukist undanfarin ár og nam tæpum 300 millj. kr. á síðasta ári. Innflutningur frá Georgíu hefur einnig verið lítill. Með gagnkvæmri niðurfellingu og lækkun tolla skapar samningurinn forsendur fyrir auknum viðskiptum á milli landanna.

Georgía er kannski ekki öflugt efnahagsveldi, en við eigum þess þá heldur að semja við þau lönd sem ekki eru komin á sama stað og við því að það er algjörlega útilokað að þau nái þeirri efnahagslegu velmegun sem við og þau lönd sem við berum okkur saman við höfum, nema með aðgangi að öðrum mörkuðum.

Ég vek athygli á því, ég ætla ekki að lesa yfir alla þingsályktunartillöguna, að í forsendum samninganna, og þannig er það almennt með EFTA-ríkin, koma líka fram ýmis ákvæði sem tengjast hlutum sem við viljum sjá og eru þau nánar tiltekið á bls. 1 og bls. 2 í þingsályktunartillögunni.

Virðulegi forseti. Ég legg til að að lokinni þessari umræðu verði tillögunni vísað til síðari umræðu og hv. utanríkismálanefndar.