áætlun um vernd og orkunýtingu landsvæða.

Herra forseti. Ég þakka hv. ræðumanni fyrir fína ræðu. Hún hefði alveg mátt vera enn þá lengri. Mig langar aðeins að velta upp vangaveltum mínum í þessu samhengi. Það kom fram í máli hæstv. ráðherra að 90% af framleiddri orku er í notkun hjá stóriðjunni í landinu. Nú á dögunum lagði hæstv. iðnaðarráðherra fram tillögu til þingsályktunar varðandi aðgerðaáætlun um orkuskipti. Hvað finnst hv. þingmanni um stefnu stjórnvalda í þeim málum? Það hefur verið lenska í gegnum tíðina að fara út í virkjanir til þess bara beint að stinga í samband við eitthvert álver. Það er virkjað fyrir stóriðju.

Núna er spurningin eðlilega: Hvar vantar rafmagn? Eru það heimili og minni fyrirtæki í landinu? Er það þrýstingur frá stóriðju? Eða horfum við fram á breytta tíma og breytt samfélagsmynstur og sjálfbæra þróun í þessum efnum varðandi orkuskipti og nýtingu á grænni orku til orkuskipta, hvort sem það er á landi, láði eða legi?

Í þeirri þingsályktunartillögu sem ég vitnaði í kemur fram að lagt er til að markmið fyrir árið 2030 verði 40% hlutdeild endurnýjanlegra orkugjafa í samgöngum í landinu samanborið við eldsneytisspá sem gerir að öðru leyti ráð fyrir 27% hlutdeild endurnýjanlegra orkugjafa árið 2030. Þykir hv. þingmanni ekki kominn tími til að við förum að tengja þetta allt saman, fyrir hvað við ætlum að virkja og hvort við séum í raun að tala um orkuskipti í bílaflota landsins o.s.frv.?