Lánasjóður íslenskra námsmanna.
Virðulegi forseti. Ég er ekki að segja að ég sé ósammála því að við þurfum að skoða lánareglurnar. Það er mjög brýnt að við förum saman í heildarendurskoðun á þeim. En í dag er munur á aðfaranámi og stúdentsprófi. Ef við ætlum að fara að breyta því núna þá erum við að gera meiri háttar breytingar á lánafyrirkomulagi Lánasjóðs íslenskra námsmanna og eru það miklu stærri breytingar en hér segir til um þar sem við erum aðeins að veita þessari framkvæmd sem er nú í gildi hjá lánasjóðnum lagastoð.
Ég er alveg opin fyrir því að við skoðum hvernig aðfaranám eigi að vera af því að það er ekki ígildi stúdentsprófs í dag. Það eru þá meiri háttar breytingar. En ég er alveg tilbúin að skoða þetta í haust í heildarendurskoðun um lánasjóðinn.