tillögur dómsmálaráðherra um skipun dómara við Landsrétt.

Frú forseti. Hér er um mjög stórt mál að ræða þar sem ætlunin er að skipa 15 nýja dómara við nýtt dómstig, nýjan Landsrétt, sem markar tímamót í réttarsögunni sem samstaða var um hér á þingi. Það er lykilatriði að allur málatilbúnaður með þessa skipan sé hafin yfir vafa. Minni hlutinn á Alþingi hefur gert athugasemdir við rökstuðning ráðherra og telur ekki sýnst út frá rökstuðningnum að rannsóknarskylda hafi verið uppfyllt. Þeir sérfræðingar sem beðnir voru um álit á því atriði töldu að þeir hefðu ekki nægjanlegan tíma til að leggja raunverulegt mat á þessi atriði. Þess vegna lögðum við í minni hlutanum til að málinu yrði frestað þannig að ráðherra og þing fengju meiri tíma til að tryggja viðunandi umbúnað málsins. Þess vegna leggjum við til hér á eftir að málinu verði vísað aftur til ríkisstjórnar í sama tilgangi. Verði frávísunartillaga minni hlutans felld munum við Vinstri græn leggjast gegn málinu, því hér er um heildartillögu að ræða. Afstaða okkar felur ekki í sér afstöðu til þeirra einstaklinga sem um ræðir heldur málatilbúnaðarins í heild sinni.