fjárlög 2018.
Virðulegi forseti. Það hefur komið skýrt fram að vandamálið með veiðigjöldin er hversu seint þau eru innheimt og þá ekki miðað við núvirði. Mig langar að fá að vekja athygli á því fyrst hv. formaður fjárlaganefndar nefndi það, að samkvæmt fjármálaáætlun er gert ráð fyrir 10,2 milljarða innheimtu á veiðigjöldum í verkefninu um aukna sátt um greiðslufyrirkomulag af sameiginlegum auðlindum hafsins. Í fjárlagafrumvarpinu, sem er byggt á fjármálaáætlun, er gert ráð fyrir tekjum upp á 10,2 milljarða. Það er bara verið að fara eftir fjármálaáætlun. Byggt er á verkefni um innheimtu á veiðigjöldum eða einhvers konar gjöldum af sameiginlegum auðlindum hafsins í þeirri sátt sem talað er um í fjármálaáætlun. Sáttin er nokkuð sem við horfum mikið til sem lýðræðisflokkur. Ég hlakka til að sjá framvindu starfs þeirrar nefndar sem á að vinna að þessari sátt. Mér finnst mjög áhugavert að gert sé ráð fyrir þessum 10,2 milljörðum í tekjur áður en búið er að klára sáttameðferðina.